الرئيسية / أدب البيظان / لكطاع / اكطاع ..الجمل والسيارة “الوتة”

اكطاع ..الجمل والسيارة “الوتة”

لكطاع هذه المرة حوار بين “الوتة وآزوزال ” الجمل والسيارة ..

 

الجمل

فات اعليا دهر الميراد   وارفود الثكله فات امكاد

دهر ارفود اعلي لكراد   مــن دار الى دار الى دار

ماكط اشكيت آن رفــاد   الثكلات انهــــــــار أزبار

واشبه تعرفو عني زاد   من رموز الصحرا لكبـار

 

فأسناف الحامي نجري   وألكــــلاك الوغرة صبار

واللي دار اعليا يسري   في الليل انعـدل ذاك الدار

 

 الوتة ـ السيارة

دهر الميراد ودهر اكراد   يرتفد فوكك دهر ابعاد

يــآززال ء خلي تفكـــاد   دهراعذاب الناس ولكدار

آن جيت ءعت العبــــاد   رحمــــة ماتتخمم فانهار

ترحل مارحلت ومع زاد   ارفودي مشيي ماه جار

 

ءولاني كيفك باطل من كد   كوني ننعـــــد امع طيار

وانت فالعجــــل والترفـــد   من شي تنعد امع لحمار

 

 الجمل

الوتة تختير افـــذ السيـر  لمشات امعاي فيه الخيـر

الخاسر ،وان مـــا نختير  كون انكيسوا كدية فانهار

نطلعوهـا لثنيــن أخيــــر   إلاكدت تخـــــــــط لحجار

وانكيسوا لمغاس السعير   بـــل امنين اكصار لعمار

 

لاهي تحم فم ءتــــفصل   فـــالمازوط وتوحل فازبار

وراكبهــــــا كامل يجفل   منهـا ما تزيــــلو لغيـــار

 

 الوتةـ السيارة

حك إني ماني كيفك دير  لابـــدالي نشرب يغيـــــر

نكدر نرفد برميل اكبيـر   فيه اشرابي ،وإني لحجار

مانخطاهم فالسير أخيـر   وامغاس الزيرات ولكـرار

ذاك امتين اعليا والغير  ذ بعد أنت تمرك لخبـــــار

 

ولاني كاع امعاك انت لز  فالدشرة ومســـارب لوكار

وأغــــل منك حت وأعز   وأكبر سعري عنــد التجار

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: